.. مع ضناني مش هتقدر تسكر عنيك .. ع قولة بعض الناس هههههههه - هدب الفكاهة و المرح

في يوم..مشرق بالليل.. ومن صباح هذا المساء..ولد فتى مملوح..

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

يدعى صويلح وكان هذا الفتى ...يتميز منذو نعومة اصابعه...بأنه خرشه
مع شي من الطفاقه..لايهون الأستدلاخ ويعد صويلح اول من انولد بالعالم
وهو عمرهـ سبعطعش يعني سبعطعش سنه منسدح في بطن امه يقول منيب
طالع الين تشرون لي سياره وكذلك وبعد اربع دقايق وست وسبعين ثانيه
من مولد صويلح ولدت الفتاه حصيصه والتي تتميز..بقناصيعها والتي كانت
سبب في ضياع مستقبل صويلح وايضا تتميز بطول القامه حيث انها اذا جت تركب السيارة يصفطونها بالشنطه اللي ورا بعد ان مرت عدة سنين...
وتوالت الأيام ..وفي اليوم العاشر من شباط الخامس حزيران السابع من عام الف وسبعميه وسبع وثمانون من سبتمبر نوفمبر الجاري للميلاد قبل
الهجرهـ في ذلك التاريخ اللي قبل شوي >> والله منيب قايل مرهـ ثانيه
ههههه ومن صباح ذلك اليوم ...

ترررررررررررررررررن >>هاذي ساعة صويلح الخراشه

قام صويلح من فراشه وبكل ادب اخذ الساعه وفلق بها هندي (نفس الهندي
الي جلدهـ صويلح يوم يقوله وراك تنسدح قدامي في موضوع كيف تسوق
السياره بالرياض)>>حركتات هههههه

فتح اللمبه حيث كانت لمبه لونه اسود على باله بتصير ظلام وكان صويلح
يحس باحساس نفس احساسك اذا ارسلك ابوك تشتري مقاضي ويوم وصلت البقاله نسيت وش تشتري فتح صويلح الطاقه(النافذه- الشباك) وقعد يتمغط
ويتمغط ويتمغط الين تمصع ولكن مازال يتمغط يوم ناظر تحت
ترارا (موسيقى تصوريه) انصدم واصابه الذهول مع شد عضلي بالخشم
وانهبل وجاهـ هستيريه بااصبع رجله اليسار ياللهووووول ماذا راى صويلح؟؟؟

عندما قام صويلح الى الطاقه ...نسينا نقولكم انه كان فيه ستارهـ على الطاقه
توهم مركبينها ههههههههههههه

لان مساعد المخرج الأخ محماس توه جايب القطه حقت الفلم حيث انه
قاط معنا بستارة خربزيه مائله الى اللون الأخضر الي لاشفته من بعيد
قلت انه اسود كاروهات مقلم ببرتقالي مع قليل من الشخابيط
عليها تقل شخابيط واحد بااولى ابتدائي >>كل هذا وصف ستارة اللون خنفشاري الصراحه ههههههههههههههههههه

اهم شي ...فتح صويلح الستارة ومن ثم الطاقه وبعد قليل من التمغطات
المتتابعه لفت نظره شي بحوش الجيران

وصرخ صويلح فجأهــ قائلا:وجع يامال البلا وش ذا الجنيه وانطلق
يجيب حطبه موزيها بالدولاب

انتبهت له الجنيه:عض على شحمه لااجي احوسك ...انا حصيصه بنت
جيرانكم اول مره تشوف وحده منفقع بشوشتها قنبله؟؟ خخخخخخ

رد عليها صويلح...بالفعل وليش بالقول حيث نشب الحطبه بجبهتها
واتبعها ببعض الشتائم منها قال: انثبري بس ياللي خشتك كنها حاصل
قسمة 72 على 87 ههههههه

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

ردت عليه حصيصه بنظره خاطفه تدل على مدى ماتتمتع به من خبث
ولعانه ونجاسه لو يفرقونها على فصل اولى ثانوي طاء بمدرسة خزاعه
بن اموكاشي بنيجريا لكفتهم هههه

وردت عليه قائله:كش عليك يارب تزلق بقوطي صلصه على خشتك

ويمر ددسن محمل رز ويدعس خشمك انت وجهك اللي كنه دفتر رياضيات
ابو سبعين هههههههههههههه

فيه هذه اللحظه الحاسمه من الهوشه صويلح فهم غلط..

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

وقال بنفسه ياعمري ياحصيصه تقول يارب يدعسني ددسن محمل رز
بس؟؟ ياربيييييه ماقالت محمل اكياس سمنت (علما بان كيس الاسمنت
اثقل من خيشه الرز بخمسة كيلو) ياربييييييييييه ماتحمل حبتني حصيصه
لامااقدر أي كانت أي كانت=يعني مااقدر بس بالانجليزي هههههههههههه

ولحظات ماكان صويلح يهوجس جته بياله مسرعه مرررهـ مادرها الاخشته وانتبه انها حصيصه كانت تشرب شاهي
جاء حس بهول الموقف قال لها بيتين شعر:
ماكنت ارضى تزعلين....وانتي بتهديني الزعل >>بعذره فالقته ببياله
محروم عيني شوفتك >>والله من النصب <<...لاتحرميني كلمتك >>يقصد فلقتك ههههههه

ردت عليه حصيصه وبــــكل ماتحمله من رومانصيه في وجدانها
قائله: اقول انثبر وهات بيالتنا لااجي اتوطى ببطنك >>احلى يالقويه هههه

قال صويلح:هـــاهـ ايه البياله سمي هذاه (فهم غلط صويلح وقال بنفسه
اكيد تبين احط بها رساله بالبياله بس على مين تلعبها وحط لها علك ابو طبعه وكانت الطبعه صورة عنز منسدحه ههههههههههههههههههههه



------ فترة اعلانيه اصبروا شوي الحين نجي --------






صابون ابو عنز الرهيب...تراه ازين شي اشتره تراه رهيب
حتى بصوا على عصاقيل صويلح بالمسلسل

عصييير بردقان... ذو الصفطه الذهبيه.. تشتريه بالشفاط مايتنثر ولا
شي واذا تنثر على ثوبك جب ثوبك نغسله

----------------- عودة الى المسلسل ----------------

أخذت حصيصه البياله وقزت العلك (وفهمت غلط هي بعد وقالت بنفسها
ياربيييييييه شكله حبني وش دراه ان ابريق الشاهي حقنا فيه شخر ونبي نسده بالعلك )>>خبله ههههههه
ومير تلتفت على صويلح وتقوله:خذني بقايا جروح..ارجوك داويني
(بها اللحظه صويلح قال يوووووووهــ الصيدليه صاكه)
صاكه = مصكره

صويلح وصمخ صويلح وصندوقين صمخ يالسلوقي وش قاعد تسوي
>>هذا ابو صويلح جاي يركض

صويلح:سم يبه هاه وشو نعم وش سويت والله موب انا اللي اخذ موترك
وفحط بالشارع الي ورا وصدم الهندي وفقع كوره جيرانا

طبعا ابو صويلح مسك صويلح وعبر عن مشاعره بحيث انه صفقه
تصفيقا مبرحا وبنفس ذيك اللحظه

حصيصه..حصيصه ياجعل يطيح عليك مكيف الصحراوي وجع وش تسوين بالحوش >>هاذي ام حصيصه جايه تركض ..

حصيصه ردت وبكل لطف:أصلا ماعندنا مكيف صحراوي

طبعا ام حصيصه مسكت حصيصه وربطت قناصيعها بالمروحه
وشغلتها على رقم 5

في صباح يوم جديد..وبعد ماانتهى ابو صويلح من تصفيق صويلح
وطاحت حصيصه من المروحه

حصيصه..قررت تروح البقاله وبكل براءة اخذت معها شنطتها الرهيبه
اللي مليانه صواريخ وطرطعان وفشق للشوزن وعلكين من اللي يطقطقن
(يجدر بالذكر ان حصيصه ذات سوابق بسرقة الولاعات من الباكستانين
اللي يعمرون عمارة قبالهم واكتشفوا انها تستخدم الولاعة لشب الصواريخ
والطرطعان) فتحت حصيصه باب الشارع وكالعادة مر ددسن محمل سبعشرين هندي كلهم ملتفتين للجهة الثانية مايبون يشوفون حصيصه
سارت حصيصه بالشارع متجهة للبقاله واثناء مشيها حست باانها مراقبه
(نفس الاحساس اللي يجيك اذا كنت قاعد تنقل واجب الرياضيات بالفسحه)
وبحركه شريعه التفتت حصيصه على بالها كاشفتهم واذا بها تدعس قوطي
صلصه(الذي سبق ذكره بالحلقة القادمة) وتزلق فيه وتخم الأرض وبذيك
اللحظة كان صويلح جاي يركض لاحقينه شباب الحارة يبونه يجيب قطة الكوره ويوم شاف صويلح حصيصه ويكععع ضحك هييييييييع هيع هيع هيع >>صويلح وهو فاك كشرته ويضحك جت ابتسامه له تلك الابتسامه
الخضراء ذات الرونق الي مهب سهل واللي لاشفتها تحسبها كروكي
توصيف قصر عروس
بس ولو ذا الضحكه كانت سبب ادى الى ان صويلح نقز لحصيصه
ومد له يده يبي يقومها من الأرض

يوم مدت يدها له جاء قالها بكل ماتحمله خشة صويلح من رومنسيه:
قومي يابعد جنوط المكسيما الي واقفه هناك ..سلامات لكرتون العلوك
الي معك هههههههههههههههههه

ناظرته حصيصه بازدراء قائله:صلوحي

رد صويلح:وبعد ان اصابته حالة من الذهول وعم على خشته هالة من
السعابيل وقال:هاه ياخشم صلوحي

حصيصه:تصدق اني لاشفتك اتذكر حمزة ادريس يوم يضيع البلنتي
>>حصيصه كانت حاضره مباراة المنتخب هع هع هع هع

صويلح:ياعمري ياشيخ تصدقين لاشفتك اتذكر اني ماحليت واجب العلوم

حصيصه:ياربيييييه ذبحتني تراك براطمك البنفسجيه ماخلتني انام الليل

صويلح:وانا وش اقول اجل مع قناصيعك آآآآهـ بس ياليتني البوكله اللي
فوق راسك

بهذه اللحظات جاء صوت واحب ساحب جلنط عند اللفه وجاي طاير
ناحية حصيصه وصويلح




--------فترة اعلانيه اصبورا علينا شوي والحين نجي ------------
[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]
--------------------------------------------------------------------------------

شمبو الحبشوش الزين انواع النفيخات تطلع لك ويجي معه هديه عبارهـ عن مسواك استخدمه صويلح بالمسلسل

---------------عودة المسلسل----------------

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

تربت تيت تيت تيت تيت تيت تيت >>هذا فيحان طاق الترنق البرتقالي
ابو شخطين على جنب وقاعد يشربك

فيحان:صويلح ترى عندنا مباراة اليوم بالحبشة لازم تجي

صويلح مازال خاق مع حصيصه ويناظرها وهي رايحه ويقول بنفسه
آآهـ ياحلوها تشبه ثلاجتنا ام 36 قدم >>الله يرجك هههههههه

صويلح:خل عنك بس قم شغل اللكزص (اللكزص=الهايلكس بس يدلعونها)
وينقزون للكزص ويلحقون حصيصه حصيصه فهمت غلط وتحسبهم البلديه
كشفوها انها مهربه صواريخ وطرطعان عاد هجت للبقاله

دخل صويلح للبقاله وهم متلطم (هذي قمة التنكر عند صويلح)
شاف حصيصه وجاء يركض نحوها شافته هي وضحكت باشر عليها
صويلح بحمضيات وجت فلقته بالحمضيات
وقالت:يالله ياابن الناس ابعد عند دروبي..منتا ولي علي..وصوبك ماهوصوبي

صويلح وهو متأثر بجراحه قال أغنية باك ستريت بويز اللي بالوجهة
الاول من آخر شريط لهم
I need you..tonight..I need you..this time

حصيصه:ولكن صويلح تدري اني بسافر عقب اسبوع بروح للكاميرون
اكمل دراستي بفن شب الصواريخ

وقبل ان يقول صويلح شيئا &&& سمعوا دوي انفجار من بعيد وهو كان
صوت ابو صويلح وهو يعطس هههههههه
واذا بصويلح بدا يتنافض وصار كنه من بياجر منول واطلق صويلح عصاقيله للريح ياترى الى اين؟؟؟

صويلح يركض ويركض ويركض يلتفت ورا ويشوف خشة ابوه وهو
معصب يلحقه بالددسن
ابو صويلح:اوقف لاادعسك انت وسيقانك اللي تقل عسيان نخله

صويلح وه وه لا منيب كل يوم تصفقني حرام عليك

ابو صويلح: وبكل مايحمله من كرهه لولده صويلح يسحب جلنط
مما ادى الى انه صدم صويلح مع اصبع رجله الصغير
ويخر صويلح صريعا.....

نروح لحصيصه...كانوا يلحقونها اربعة هنود موب حبن فيها بس يبونها
ترجع لمبات سياكلهم ماخدتهم تقول تبيهن عندنا عمل فني لاابله هيله
اهم شي رجعت حصيصه للبيت مادرت وش صار لااصبع صويلح
كانوا اهلها مايبون يعلمونها بالخبر المحزن
كلهم يتصددون عنها الين جت ام حصيصه وقالت لها بكل ماتحمله
خشتها من حزن:انتي يالخبله دريتي ان صويلح انكسر اصبعه
ردت حصيصه والدموع تغمرها عينيها قائله:احسن وذهبت حصيصه
لفراشها تبي تنام ولكن فكرت وتبادر الى ذهنها فكرره خطيرة اخطر
من هجمة الكانو الي بالعارضه يوم مباراة الهلال والنصر
وقالت حصيصه بنفسها خلاص ابلعب حسب تكتيك حبيبي صويلح
وحسب نظريته الي تقول خربانه خربانه

ولبست ملابس الخطه.. وهي عبارة عن كنادر الخطة (ماخذتها
من ابو الباكستاني)شماغ ابو كريم ابو جيرانهم وكان معلق شماغه
بالسطح يبيه ينشف واختفى فجاه ملابس الرياضه حقت اخوها سعيدان
وكانت عبارة عن الوان فريق نادي مدغشقر اللندني بواشنطن
علما بان سعيدان كانت عنده حصه رياضه بكرا نزلت حصيصه
للحوش تلفتت ذات اليمين قليلا وذات اليسار واذا بها تنقز من شدة
الخوف ماذا رات؟؟؟ يالهي انه صويلح

حصيصه:الله ياخذك وش جابك حوشنا

صويلح:هاه وش لاجاي اشوف وش اطول نعال ابوكم ولا نعال ابونا

حصيصه:تصدق اني كنت بنقز على بيتكم بشوف وش احلى صحونكم
ولا صحوننا

صويلح:حصيصه بلانصب تراي جاي اقولك شي خطير

حصيصه:وشو صلوحه عمري

صويلح: وبعد انا اصابته حالة استدلاخيه دامت ربع ساعه من هول
كلمة عمري قال:مااعتقد ان فيه بالدنيا ملاك تشبه لزولك تصور مجمعه

حصيصه:وهي ضايعه علومها:لاتنصب شغالتنا احلى مني

صويلح وبكل مايحمله في براطمه من لعانه: هاه وين شغالتكم تنام

حصيصه:وجع ياشينك انت وخشتك تراي اغار عليك




-------------------وقفه مع اهم الانباء----------------

الموجز:
صواريخ من نوع ابو فاس...قطع امدادات ميرندا الفراوله عن المتضررين
بحارة ابو صويلح... قنابل الفكس بألمانيا





الاخبار بالتفصيل....:

هددت رئيسة وزراء النرويج السيدة فطيمه ام العصاقيل بتصريح نقلته
وكالة ابو زهقه لأنباء انها ستقوم باارسال صواريخ من نوع ابو فاس
الى زغرب

وقالت ايضا ان بااستطاعتها قطع جميع المويعينات(تصغير مواعين)
عن تلك البلاد مما اثر ضجه بالوسط الجنوبي من بتنجينقا

لحظه ابقلب الورقه >> ههههههههههههههه

قام السيد جون دويرج رئيس المانيا الانفصاليه باهداء جائزة نوبل
للسلام لسيدة وضحى الشناوي حين ابطالها للقنبله الفكسيه المسيله للدموع

قال مصدر موثوق بكذبه ان الشيد دغيليب افتتح الخيمه الجديدة بحارة
ابوصويلح وقام بشب حطب البرسويس بدلا من السمر حفاظا على
الحياة الفطريه

-------------أعزائي المشاهدين طولنا عليكم بس معليش-------------

صويلح:حصيصه الى متى وانا بصير محروم من ضوفة خشتك
السحريه اللي احبها اكثر من حبي لاابوي

حصيصه:خلاص هانت وشرايك نهاجر لبيت خويك فيحان

صويلح:اما نروح لفيحان معصي والله لو تموتين

يجدر بالذكر ان فيحان مملوح وذو شوشه ويتمتع بأسلوب في كلامه
مما سبب في تضييع علوم الفتيات لذلك لزم التحذير من فيحان لما
يتمتع به من جاذبيه

حصيصه:ياربييييييه متى نتلاقى ونقعد نلعب بلاي ستيشن بشريط الكوره

--------------------------------------------------------------------------------

صويلح:اص بس تخبرين يوم اعطيك فريق البرازيل وانا اخذ السعوديه
وارقعك 5 صفر

حصيصه:ايه اصلا كنت ناسيه وش اللي يشوت كل ماضغطت شي مايتحرك

(علما ان صويلح كان فاصل اليد حقت السوني ولاعبين على حصيصه
وهي مصدقه) هههههههههههههههههه
وفي تلك اللحظة اذن الفجر وجاء وقت سفر حصيصه بعد معاناة دامت نصف ساعه بين صويلح وجدار بيتهم حيث انه عجز ينقز الجدار
بما انه كان لابس وزره كاروهات مما ادى الى صعوبة التعامل مع الجدار
وفي اثناء نقزته للجدار لاحظ شي مكتوب على الجدار واذا به يرى رسمة
قلب شاقه السطور ومكتوب جنبه حص +صلح=حب وفصفص
ونود لفت انتباهكم لما تتمتع به حصيصه من ذكاء في التمويه
عشان ماتنكشف انها تحب صويلح

عندما عاد صويلح لغرفته قرر ان يتروش (وهي تعتبر المرة الثالثه في حياة صويلح وقد سبق له انه تروش عام 1407 وعام 1415)
واثناء ماهو يسبح انكسرت الطاقه وطاحت بلكه مبروط عليها صحيفه
بلكه وهي حصاته (حجر) متوازي الاضلاع ذات لون رمادي تشوفه
دايم عند العماير الي توها تنبني وينزل صويلح يركض للحوش
حصيصه وهي دالقه خشتها (يعني مبتسمه مع قليل من الدلاخه)
ويمسكها صويلح ويصفقها لين عضت الارض

صويلح:انتي بالمهبوله كسرتي فرشة اسنان ابوي

حصيصه:وش اسوي عاد البلكه اخف شي لقيته والا كنت ناويه
احلت = ارمي جنوط الجمس

صويلح:طيب اصبري بروح اقرا الرساله

حصيصه:ايه تراني مستحيه حتى شف خدودي صارت لونهن برتقالي

نود لفت عناية السادة المشاهدين اننا قمنا بقطع هذا المشهد السابق
من قبل الرقابه حيث ان صويلح كان جاي يركض ولاامداه يلبس
شي غير المقوصر (المقوصر:عبارة ن شورت ولكن سادة يعني بدون
ألوان)

رجع صويلح انسدح فتح الرساله وبدا يبحر في امواج الرساله وكل
مايقرا سطر يقعد يضحك مره ويصيح مره اخرى
نقز صويلح للتلفون دق بيجر على صديق عمره فيحان

صويلح:999.....عالو فيحان عندكم؟؟؟

999:ايه وشدراك...

(فيحان مشهور بأنه يحب يقطع الاشارات لانه يحب سندويشات
الجبن الي بالحجز)

فيحان:صويلح وش تبي ياخي قاعد العب بلوت مع اكبر عربجي
بالشرق الاوسط عبد الكريم ابو جلمبو وخليته يفلقني بحطبه تذكار

صويلح:اها بس لايكثر هج من الحجز ورانا مطارده

فيحان:تامر امر يابو صلوحه

صويلح:هلا عساك من العوادة >>صويلح مايعرف يرد ابدا

سعيدان (اخو حصيصه) قاعد يشغل الددسن وينادي حصيصه
قائلا:اختاه هيا بنا سوف نذهب
(سعيدان بااشد المعجبين بعبسي صديق عدنان)
عبسي اللي هو صقيقي

حصيصه:ورا ماتنثبر لااجي اعفط خشمك ذا اللي كنه ركبة
مصطفى ادريس..
سعديان يمسك حصيصه ويركبها بالصندوق حق الددسن ويمشون
ولكن اين صويلح؟؟؟
حصيصه قلبها يطقطق وتقول بنفسها ياربيه وين صويلح اطلبه
تسعطعش ريال

لحظه ماذا نرى.... نشوف غبار وعجاج قادم من بعيد يالهي انه
اللكزص حق فيحان سعديان مسرع وجرس السرعه يرن لانه تعدى
سرعة 160 بس ولو يقول عادي ومشغل أغنيته المحبوبة
يابنات المدراس ليتني عندكم سواق >>مغبر هههههه

حصيصه بصندوق الددسن والهوا مطير شوشتها ولاتهون
عصاقيلها الفسفوريه

صويلح يقول لفيحان بكل حماس:قرب لمهم بسرعه

وبحركه من صويلح تشبهه حركة توم كروز بفلم ميسيشن
امبوسيبول 2 مع فارق الخشش ونقز فوق كبوت اللكزص

وصويلح والهوا لاعب بخشته لايقدر يشوف زين:فيحان الله
ياخذك ورا كبوت السيارة حار اقرب شوي لمهم

حصيصه عم في قلبها الفرح مثل فرحتك اذا قمت الصبح ولقيت
موترك معبا بنزين فل وتنقز لاخر صندوق الددسن وتمد يدها لصويلح
قائله:صويلح دوك يدي حط التسعطعش ريال>>ماشاء الله يدها تنفك وتتركب مره ثانيه صارت لعبه ههههههههههههههههههههههههه

صويلح:وجع هذي يد ولا ملعقة والله على بالي ذي مغرفة رز
>>ههههههههههههههه الله يرجه يحطم

وبلحظه جت اشاره وصارت حمراء وينقز صويلح لصندوق الددسن
وينسدح متغبي ولكن توهق صويلح كان بالاشاره شرطة اللي يقولون
حط حزام الامان طبعا سعيدان مسوي فيها ينكت وقاعد يسولف مع
الشرطة ولكن الشرطي الفذ جبران خليل جبران>>حمولتن طيبه ونعم ههههههههههههههههههههه ....لفت نظره شي بصندوق الددسن
وعندما اقترب من الصندوق....!!!
صويلح...وهو يهم بالانسداح خوفا من ان يراه الشرطي جبران
قال هامسا يااذن حصيصه: أحــبــك

حصيصه:صلوحه وشو وش قلت؟؟

صويلح:أحــبــك... خلاص تعبت قلبي يعورني كل يوم ابي اقول
هالكلمه خلاص مانيب قادر اتحمل

حصيصه:ياعمري انت عطني يدك

صويلح:خذي قلبي وخذي عمري مو بس يدي

احذت حصيصه يد صويلح وحطتها بين كفوفها ةغمضت عيونها
وقالت:صويلح أحــبــك اموت فيك

صويلح:وانا أحــبــك لو تجافيني على كل الخطا مسامحك احبك يانظر
عيني ورضاك الزم

التقت عيون العاشقين وكل منهما يغمرهما الحب هم صويلح بابعاد
خصله من شعر حصيصه نزلت على عيونها

وقالها:
من شفتها ماميز الصوت من همس**يسبح النظر فيها ولايمل نظرتها
غظيت عيني عنها كان بالامس**واليوم انامن بعدها ملك ضحكتها
لوتنظربعين اللطف للحجر حس**تحت القدم حس الثرى بخف خطوتها
>>ياعيني على الحب ههههههههههههههههههههههههههههههه

حصيصه:آه ياصلوحه عمري كافي عذبتني ونزلت من عينها دمعة
لما اعتراها من حب جامح لصويلح وقالت له:
دمعتي تبيك عن حب اكيد**غيرها ياروح روحي وش بعد

وفجاه... واثناء هذا المشهد العاطفي واللي كلنا انا وطاقم التصوير
كنا قاعدين نشاهق من الصياح >>لاينط فيكم عرق من الشهاق ههههههه

--------------------------------------------------------------------------------
طب الشرطي جبران خليل جبران(الله ياخذك انشاء الله قطعت علينا
احلى مشهد بالمسلسل)

وقال جبران:ايش هذا ايش قاعدين تسوو هونا

صويلح:اقول كل تراب لااقوم احوسك ولاتناظر حصيصه لااتوطى ببطنك

حصيصه:وجع وش ذا الخبل وراه يناظرن كذا

جبران:اقلك انتا مين؟؟ وش قاعد تسوي هنا؟؟

صويلح:ياخي ياشين الدلوخه قاعد اسوي خبز وش شايفني
اسوي بعد انت

حصيصه: صلوحه عمري انقز بنا لسيارة فيحان خل نهج
ويشيل صويلح حصيصه ولو انها اطول منه ويركض بها
بين السيارت وحصيصه تغمرها اسعد لحظات عمرها

صويلح والعرق يتصبب من جبينه:ودي اخذك لمكان بعيد لحالنا
وبس اناظرك مابي اكثر حدي نظر مابغيت اكثر الله امر لعيونك السهر

حصيصه:ياليت يابعد كل من لي يااغلى من الغالين ياروح روحي

(اقول ملاحظين مدى تاثر المخرج بااغاني خالد عبد الرحمن)

وصلوا للسيارة فيحان حيث كان فيحان قاعد يناظر النخله ويقول
بااستغراب وراهم مالقحوها

فيحان:هاه صويلح وش القصه

صويلح:فيحان طلبتك مابيهم يمسكونا

فيحان:افا عليك بس اوريك بجبران ذا
وينطلق بهم فيحان وطردي بالشوراع يمين ويسار يمين يسار وتخبيط بالعالم

حصيصه:صلوحه روحوا لطريق خريص ترى الزحمه زينه

فيحان:قلها تنثبر لااحوسك انت وياها

صويلح:حصيصه حبيبتي خل نلعب اونو بس خلي عنك السيارات

حصيصه:تيب عمري انته >>لاحظوا حصيصه مسويه فيها رقيقه ايه افلقني

وهم بالطريق فيحان شاف دوريات من بعيد وبدا يخترش ويسوي نفسه انواع البراءة واستخدم اسلوب صويلح المشهور وهو الذكاء الاستدلاخي وهم طايرين فجاه وقف طريق خريص من الزحمه يالهي وهم يمشون بسرعة 160 فيحان وصويلح وحصيصه لاحظوا انه فيه جمس موديل واحد على مااظن واقف قدامهم على مسافة قريبه جدا وحسوا انه سوف يحدث عناق اخوي بين اللكزص والجمس بدأ يقترب الجمس الاحمراني شيئا فشيئا ويكبر ويكبر ولكن ... ماذا؟ ..صويلح بكل مايحمله من براءة الاختراع بحركة الغزاله اللي بالسيكل قام وسحب الجلنط وبدت اللكزص وتسوي خمسميات وصارت السيارة تقل الصحن الدوار اللي التذكرة حقته بعشرة وبعد عدة دورات وبينما كان راس حصيصه رايح جاي مابين الدريشتين الي ورا حادث العناق الحار بين اللكزص والجمس طبعا فيحان مزين عمره حيث طلعله من السواقيه الدركسون مجموعه من النفيخات
اما صويلح فبكل مايحمله في طيات خشته من لعانه قام وفتح دريشة السيارة ونقز وهو متعنقط (متعلق) بقنصوع حصيصه
ويخمون الارض وبينما كانوا خامين الارض حدث مالم يكن بالحسبان!!
سيارة تمشي 2ميل منهو؟؟؟ انه ابو صويلح شخصيا ابو صويلح (وهو مطلع ربته مع الفتحه الي في السقف):وجع وش ذا العالم المنسدحه بالارض
صويلح يهمس بااذن حصيصه:اص سوي نفستس كرتون بطاطس هههههههههه

حصيصه:اقول انثبر وش بطاطسه انت وخشتك قل كرتون ثلاجه ويالله يالله
صويلح:حصيصه جبتي المقوصر حقي الكاروهات (مقوصر=شورت)

حصيصه:مهوب وقته بس ترا بقولك اني مااخذه مقوصر ابوي

صويلح:ترى ابجلدتس ومن قالتس اننا رايحين نكشت وناقصنا خيمه>>مهوب سهل صويلح يعرف يذب على مقوصر ابو حصيصه

حصيصه:اهجد بس من زين ابوك عاد اللي لاشفته من بعيد تحسبه زمزميه هههههههههههههههه

واستمر هذا الحديث العاطفي مدة دقايق معدوده>>مع وين عاطفي الا مهايطي
ابوصويلح قز فيحان يتعارك مع الاير باق وهب ابو صويلح لنجدة فيحان حيث صفقه بالزبيريه قائلا:لاتخرب نفيختنا

فيحان وبينما هو غايص بالنفيخه:ياشين ذا الشيبان لاسوو لي فيها معصبين واثناء ذلك كان صويلح وحصيصه يركضون
ويلتفت صويلح لحصيصه ويقولها وهو متحمس:انسدحي قدام الددسن الي جاي

حصيصه:كل تبن والله مانسدح ولا علشان سيقاني تقل مطب

صويلح:انسدحي بس عشان نلعب عليه وناخذ الددسن

وصدقت حصيصه بحكم ماتحمله من عشق لصويلح وتزلق على راعي الددسن بكل حماس ولكن هنا المفاجاه راعي الددسن كان شليويح توه جايب اخته فطيمه (والملقبه بالفطمي) من المدرسه ويجدر بالذكر ان بين صويلح وشليويح كره منذو الطفوله حيث كانوا يتنافسون على حصيصه وكان يستعرضون قدام مدرسة حصيصه حيث كان شليويح بحكم ان ابوه يعتبر من شرف نادي الكيرم الوطني فقد كان يستورد شورتات وبعدة الوان ونذكر منها الشورت الفوشي المقلم بااخضر والاحمر(تحسون صارت تستارة زيود) اما صويلح فلم يستعرض الا بشورته الكاروهات وكان هدية من شغالتهم
صويلح:وجع انكبنا ياحصيصه طحنا بذا الكمخه

حصيصه:ماعليك الحين العب على اخته (يجدر ان حصيصه مسلفه فطيمه لفافات الشعر واربع بوكلات)

فطيمه:هااي حصيصه ازيك عامله ايه >>صارت حسنيه مهيب فطيمه

حصيصه:ياعمري انتي يابعد شوشتي

فطيمه:وش عندتس بذا اكيد عندكم عمل فني بمادة الوطنيه

حصيصه:ايه بالحيل بس وخري بنركب انا وصويلح

شليويح:حصيصه.. أحــبــتس يابعد براطمي (شليويح يتمتع ببراطم تقدر تقول رصيف بشارع)

صويلح وهو يهم بان يجلده شليويح:حبك سوداني حول عنده اختبار فيزياء ومذاكر توحيد يامال الوجع ياجعل يطيح عليك جدار مكتوب عليه ذكريات سليمان ابو جلمبوا ويتلاقطون وتعصب حصيصه وتمسكهم وتركبهم صندوق الددسن وبكل جراءة تسوق الددسن

وجت حصيصه تبي تسوق والتفتت على فطيمه وقالت:الله يازين رقم جوال اخوك شليويح (حصيصه تناظر عداد الكيلوات تحسون ان الددسن طاق المليون) وتشغل السياره ولكن هل تبي تمشي؟؟ شغلت حصيصه السيارة وعشقت القير الثاني بحكم انه تموت على القتاة الثانية ودعست كل البنزين مما ادى الى انحلال المضاربه القائمه بالصندوق فنعتبر حركة حصيصه على ماقال صويلح يوما ما رمية بغير رامي وايضا طحيت قوطيين حمضيات بزبيريه واحده

حصيصه:فطيمه طلعي خشتك مع الدريشه واذا نغزتك مع بطنك اصرخي بما ان ذا الددسن مافيه بوري
ههههههههههههههههههههه
--------------------------------------------------------------------------------


فطيمه:طيب اوريك البواري شلون
وتناظر حصيصه بالمرايه لتطمئن على خشة حبيبها صويلح وتتفجا باان خشته لازقه بالقزازه حيث ان شليويح ماقصر ومسوي له حركه متعلمها من يوم هو صغير وفي نفس تلك اللحظة كان فيحان قد تخلص بكل حرفنه وبطرنه من الشرطه وجاء مسرعا لانقاذ صديقه صويلح ولكن..تلك حزة طلعة مدارس وفيحان فتى الحارة المملوح والذي حصل على جائزة ملك جمال الحارة لسبع سنوات متتالية

ويحجر فيحان باص فتيات مماادى الى انه باشر عليهن بكرتون سنكرس ليتخلص من هذه المشكله واسمحوا لي اقف احتراما لهذه الحركة الذكية من فيحان وصل فيحان الى الددسن وبكل حرفنه حط زبيريته على البنزين عشان يثبت السرعه وذلك بعد ان غطس الزبيريه بطاسة ماء هنا يتبين لنا قمة الذكاء لدى فيحان لانه استخدم نظرية العربجي الشهير طاحوس والتي تقول( ان الزبيريه يزداد وزنها بالماء وتصبح خفيفه كالريشة بالشمس)
وبعد ان ثبت الدركسون برجله طلع من الدريشه..
ملاحظه:انه تعلق بصندوق الددسن بيديه(اخص يافيحان غطى على فان دام) وبكل مايحمله من تهور في كيانه قفز قفزة لولبيه تذكرني بنقزة كابتن ماجد يوم كتفه يوجعه بالمباراة النهائيه وفعلا تمكن من الوصول للددسن ولكن بعد ماذا بعد ماتصفق صويلح شر تصفيق ووجد شليويح طاق ابتسامته المعهودة واللي واجهية هايلكس ويمسك شليويح فيحان ويمردغه ويصفقه تصفيقا نتج ان انشق برطم فيحان وتساقط شعيرات قذلته بمعدل اربع شعيرات بالثانية ولكن هنا تقع المفاجأة....انه ابوصويلح مجددا ويتهور ويسحب جلنط على حصيصه مما أدى الى انهم صدموا عامود اللمبه
(يجدر بالذكر انه كان جنب العمود ثلاث لحجيات يبيعن تيم وسفن آب)

وقالن اللحجيات لابو صويلح:كنقر صثبيمسثتس تنلموكو طوء خود طكر لانسزوء>>>قالنها بصوت واحد..والله مالقينا لحجي يترجم لنا ولكن اعتقد انها مديح لاابو صويلح

التفت ابو صويلح لهن قائلا:الشرهه مهيب عليكن الشرهه على السفن آب اللي قاعد معكن
وراء طب على صندوق الددسن ومسك صويلح مع عصاقيله واخذه الى البيت
حصيصه:صويلح لالالااااااااااااااااااااااااااااااااااااااا مش آدره مش آدره

صويلح وهو يسحب على الأرض وطالع شكله غلط وشكله ينرحم صاير كنه دفتر املاء مشقوق:حصيصه ترى الحب يحيا بالجوع ويمون بالغذاء>>>صراحه ماادري وش قصة ذا الجملة ولكنها تحمل في طياتها معانن جمة

عادت حصيصه الى البيت واستلمتها امها تسطيرا وتصفيقا وتكفيخا مما نتج عنه صعرور في الجبهة بزاوية 22 درجة شرقا عن الخشم انسدحت حصيصه وهي تفكر وتهوجس....واذا بها تجيها حطبه طائرة من فوق الجدار مكتوب عليها:
الى الحص الوعد 9 ليلا تحت نخلة السكري التوقيع فيحان..
وبعد عدة شتائم من حصيصه لفيحان حيث ان الحطبه جت بنفس مكان الصعرور عم بخشتها ابتسامة فرح ...لماذا ياترى؟؟؟

وفي الصباح الباكر كان ابوصويلح من زود الفضاوة قاعد يلعب اكس اوو مع الهندي اللي يغسل السيارات وتطن براسه يروح يستهبل على ولده صويلح على اعتبار ان ابوصويلح مسوي فيها عادل امام

دخل ابوصويلح غرفة صويلح:صلوحه وينك جايب لك هديه
ويدور بالغرفه ومالقى صويلح وانتبه ان سروال السنه ابوكرسي المفضل لدى صويلح ليس موجودا؟؟؟
هذا يدل على ان صويلح هاجر.؟؟ ويصرخ ابوصويلح بااعلى صوته:وجع وين ذلف ذالدلخ وينقز مع الدريشه (وين صار سوبر مان) ممتطيا الددسن في هذه الاثناء ...كانت حصيصه توها قايمه وخشتها صايره تقل صطل بويه..يوم فتحت نور الغرفة..تفاجأت بوجود شخص...؟؟؟؟؟

قالت حصيصه وبكل دهشه:هااااااو؟صويلح؟؟؟ صلوحه عمري وجع وش مدخلك غرفتي

صويلح وهو يناظر من الدريشه:انثبري شوي تراني متنكر على شكل شماعة ثياب اص

حصيصه:صلوحه قلي مكان نتلاقى فيه وخلاص

صويلح:انا بس جيت ابشوفتس وابمشي القاتس بنفس المكان الي حدده فيحان تحت نخلة السكري

ونقز صويلح من الدريشه وتزحلق بالماصوره ويطيح بشغالتهم تلعب كيرم جاء صويلح بكل نجاسه نثر الحبوب وقال:ياشين السرج على البقر...
وكان فيحان الصديق الصدوق والفتى المخلص لصويلح ينتظره باللكزص عند برادات المسجد

صويلح:فيحان ابشرك ماشافني ابوحصيصه

فيحان وهو يناظر البراده مستغربا:ياخي ذا العربجي ابو جلمبو ماخلى مكان الا كتب فيه ذكرياته

صويلح:فيحان وراه ماتعقل لااجي انتف ذا الشعره االي بقرعتك
(يجدر ان فيحان عقب ماانجلد من شليويح طاح شعره وصرفها وحلق صفر على باله ظلال رونالدو)

فيحان:اركب بس انت وجهك اللي كنه برشامة املاء بااختبار تعبير

وضلوا لنفس الموعد لنخله ولاحظا وجود غزال الصحراء انها من؟؟
انها حصيصه ومعها صديقتها فطيمه

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

صويلح وهو يركض وفاق كشرته:حصيييييييييييييييييييييييصه
وحصيصه تركض لمه وتصرخ:اصبر اصبر لاتجي الله ياخذك مالبست الكعب زين

فيحان يناظر فيطمه بكل استغراب ويقول في نفسه: وش ذال الطخمه الله ياهي حلوه شكلي ابستعرض مهاراتي

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

فطيمه وهي تناظر فيحان وتقول في نفسها:ياربيييييييه وش ذا الملاك ولو انه قرعا
صويلح بعد ان خطف حصيصه خلف الشجره وقال:حصيصه شلونتس عمري مهما فرقونا العواذل مهما صفقني شليويح لن اتركتس وقالها أغنية وين مايروح الاخضر انا وياه(بااعتبار ان حصيصه لابسه تنوره اخضرانيه مقلمه ببرتقالي..ولو تحسون انه علم بنجلادش)

حصيصه:عيوني صلوحه ابي اهاجر معك لأي مكان

صويلح:خلاص انا مجهز كل شي نبي نمشي للشرقيه هالحين
وفعلا كان صويلح مستاجر هايلكس انطلقوا به متوجهين الى طريق الشرقيه

وكانت فيطمه لحالها وقالت لفيحان:افا وش ذا الجحده

فيحان:هااه ايه وش ذا صح وش رايتس اوصلتس؟

فطيمه:مش أدره مش أدره مش عارفه ليه

فيحان:اقول اص بس ياظلال اصاله ويسحبها مع شوشتها بكل حنان الى اللكزص

بينما كان صويلح طاق سواليف مع حصيصه نقتطف منها هالسالوفه:
تصدقين ياحصيصه يوم انا صغير تضاربت مع اربعه كبارين وصفقتهم كلهم

حصيصه:اييييه على مين ماكني شايفتك يوم يتوطى ببطنك شليويح ...اهم شي وصلوا تفتيش الرياض الاول

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

الشرطي عقاب جزاء وقفهم وقال:اربط الحزام

صويلح على باله يستعرض عند حصيصه:لامالي خلق

عقاب:اجل مالك خلق طيب انزل ويصفطون على جنب وبعد قليل من الهوشات مشوا صويلح بعد ان توسطت له حصيصه

--------------------------------------------------------------------------------
وصلوا شاطئ نصف القمر..طبعا صويلح طب يركض مشفوح اول مره يشوف بحر اما حصيصه كانت تغير الاستبنه بحكم انه فيه كفر منسم شوي وبينما كانت تغير الكفر جاء ظلال واحد جنبها والتفت وتفاجأت ان شليويح؟
ويخطف حصيصه ويركبها بالغصب وتصارخ وتصارخ
ويجي صويلح يركض وهو يتاقطر ماء ويصرخ نجوى اوه قصدي حصيصه حصييييييييييييصه وجت موسيقى حزينه
وهو يركض والسيارة تبعد وحصيصه تناظر بالقزاز وتصيح طاح صويلح من التعب وقاعد يقول:
اقفت مراكبهم الا يالله الخيرة** عيني تفيض الدمع بفراق خلاني
وحس صويلح بفقدان الامل ولكن كالعاده المنقذ ياتي في وقته انه فيحان

فيحان:صويلح ياخي ضاقت الاماكن الاتنسدح فيذا>>>فيحان مسوي نفسه من اهل الرياض هههههههه

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

صويلح:فيحان تدري اني أحبك اكثر من ميرندا الفراوله

فيحان: اهم شي اركب بس وياانا ياشليويح ذا وهذا شنبي احلقه اذا مالقيته لك

صويلح:تشلم تشلم ..بس وراك جايبن معك نوال الزغبي(فطيمه تغني على دلعونا على دلعونا)

وبعد ان خلصت فطيمه من أغنية على دلعونا وجت تبي تغني أغنية ام كلثوم اقبل الليل.. واذا بصويلح يركض الى شنطة اللكزص ويجيب حطبه ويصفق بها فطيمه ويبدو ان صويلح قد ضاق ذرعا بفطيمه

وقال له فيحان:ياخي وراك عليها صوتها ازين من صوت كنداسة مازدا مشقوقه بس ولو حلو

فطيمه وهي تمسح خشتها:فحوني ايش بوه هادا على باله معصب
(فحوني على بالها دلع)

صويلح:اجل فحوني اقول اهجدي بس لااقوم امحطتس بالعقال

فيحان:صويلح تراك زودتها من زين حصيصه هي وخشتها اللي كنه جدول ضرب خمسة... وننتقل الى حصيصه حيث بعد ماخطفها شليويح كان رابطها بالمرتبة الي ورا وقايلها حصيصه يابعد ركبتي لاتتحركين لمين اجي ونزل للبقاله يبي يشتري عسكريم (عسكريم=ايس كريم) وبينما كانت حصيصه تهوجس دق جوال شليويح ونقزت تبي تشوف الرقم ياللهي انه رقم سعيدان اخوها,,,,وتضغط على يس بخمشها وترد

سعيدان:الوه شليويح صديقي فينك بوه

حصيصه:سعيدان اخوي ياحبي لك هيلب مي تكفى

سعيدان:وش ذا شكلي غلطت ودقيت على جوال شغاله

حصيصه:سعيدان يالدلخ انا اختك حصيصه لاتقهرني

سعيدان:هاه ياذ البنات ابلشوني لارحت اشتري خبز اللحجيات ينشبن بحلقي حتى هنا بعد

حصيصه:سعيدااااااان وجع (وتبادر الى ذهن حصيصه معيارة سعيدان الشهيره) <<ياسعيدان.. يابو فنيخه

سعيدان سمع ابو فنيخه من هنا ومير يصاب بالذهول وقال: حصيصه وجع وش جابك لجوال شليويح ليش تسرقين جوال صديقي

حصيصه:يالدلخ شليويح ذا الحمار خطفني يالله رح ازهم على صويلح وقله اننا واقفين عند بقاله اسمها الورود

سعيدان:هاه ايه طيب مع السلامه

يدق بيجر صويلح وينقز يروح يدق على سعيدان صويلح:هلا سعيدان وش تبي منيب لاعب ياخي لاعمرك تدق علي

سعيدان:ياخي ابيك تجيب اختي من المدرسه قصدي تقولك اختي انها هي وشليويح عند بقاله اسمها وشو ياربي نسيت

صويلح:وشو حصيصه وينها ياسعيدان تكلم تذكر يالله بسرعه

سعيدان:ياخي اصبر ابشرب سفن أب ايه تذكرت بقالة اسمها الشجر مدري الزهور ماادري ورود

صويلح:ياشين الدلوخه ياناس ودي اجي واجلدك لين تعض الارض

سكر الخط والتفت صويلح على فيحان حيث كان فيحان يناظر جبهة فطيمه مستغربا ويقول في نفسه: الحين ليش جبهتها تقل مربوعه

صويلح:فيحان تعرف بقاله اسمها الورود...؟؟

فيحان:ايه اعرفها افا عليك بس ياخي ليش فطيمه تشبه صدام الهايلكس بس ولو حلوه
ويتبسم صويلح وتبان الدرايش الي في ثمه وهي من اسباب الركبه اللي جته من شليويح وينطلقون الى البقاله المذكورة بها من حص الا صلح سمعت شليويح مواعد صديقه على كورنيش الخبر
ويرحون لكورنيش الخبر وينزلون يمشون وفيحان يمشي ويقول مستغربا وش فيه ذا البنات ماعمرهم شافوا واحد مملوح ويدهر فيحان يباشر على البنات ويطق معهن سواليف وفطيمه ودها تجلده وصويلح كان يمشي ويدور وفجأة لفت نظره قرطاسه علك ابو طبعه اللي تاكله حصيصه ويركض وفعلا يجد شليويح منسدحا وحصيصه قاعده تناظر البحر ويتغبى صويلح ورا الجدار وينادي فيحان ويرد فيحان :هاه ياخي ترى شليويح صفقني الين قلت بس

صويلح:ماعليك ابهجم عليه بقارورة وانت بالحطبة

وهم يمشون شوي شوي شافت فطيمه حصيصه:وقامت تصارخ هع هع هع حصيصه تعالي نلعب

ويلتفت فيحان لفطيمه ويصكها بالحطبه قائلا:الشرهه مهيب عليتس الشرهه على الي جايبك

وانتبه شليويح وقام عليهم ويهج صويلح ويلحقه فيحان ويراكضون ولكن فيحان بكل ذكاء وبحكم معرفة بنقطة ضعف شليويح صرخ وقال:شليويح (حيث ان فيحان كان ماسك الجوال يبي يحلته (يحلته = يرميه) بالبحر) ويصرخ شليويح .. الزبدة ركض صويلح لحصيصه واخذها وجاهم فيحان يركض ويهجون ويلحقهم شليويح وقرووا يرجعون للرياض وهم في طريق العودة مسكتهم الدوريات بقيادة جبران خليل جبران قرر صويلح قرار خطير بعد وصولهم الى الرياض واتجه الى بيت ابو حصيصه نزل حصيصه وطق الباب وفتح ابو حصيصه وقاله: ابو حصيصه ابقولك سر خطير

ابو حصيصه وهو يناظره بنظرة اشمئزاز مع قليل من الاستغراب:خير وش عندك

صويلح:انا طالب يد بنتك حصيصه وابي اتزوجها

حصيصه:ابد اذا نجحت هالسنه انت وياها افكر انشاء الله

نقز صويلح لفيحان وقاله: واللي يرحم والديك وين وصلنا بالجغرافيا (صويلح بثالث ثانوي ادبي)

فيحان: ياخي وش دراني آخر مره حضرت يوم يعطونا الكتب

صويلح:ياخي لازم نجتهد يالله امش نروح لهاني يدرسنا (يعتبر هاني من دوافير المدرسه ماخذ بالجغرافيا 17 من 15 لان حل اسئله زود) لقوا هاني ببيتهم كالعادة وفتح هاني الباب :اهلين صويلح وايضا فيحان اكيد جاين تبون واجب الجغرافيا بس منيب مديكم هوا..

فيحان وبكل رقه: وراء ماتعقل انت لااجي اوقع على جبهتك

--------------------------------------------------------------------------------
هاني:اوكي تيب تيب ادخلوا... وقعدوا يذاكرون وصويلح بدت تظهر عليه اشباه مدحت من كثر المذاكرة وبعد اوقات عصيبه مع هاني وتفحيط على دفتر التاريخ وطقاق مابين صويلح وفيحان على برشامة الفقه مع انه كان اختبار حديث واقتربت الأختبارات واليوم الاربعاء ..والسبت اختبار علم اجتماع وحديث وكان صويلح وفيحان منسدحين بالملحق وقام صويلح فجأة ناظر فيحان وفهمه فيحان كالعادة وقال صويلح: احبها يافيحان آه ياحصيصه ويمسك الكتاب ويغطي وجهه فيه

ويجيه فيحان ويحضنه ويبكي صويلح على صدر فيحان وكان فيحان يناظر رقم الفنيله حقت صويلح ويقول مستغرب ياحبي لك صويلح من عرفتك وانت حدك فنيلة علاقيه مشخله بعد

طب عليهم ابو صويلح يوم شافهم قال:لاياشيخ انت وياه ياجيبين هدف التعادل الحين قم لاالحين امحطكم بسعفة النخله

وهم يذاكرون والشواهي تدهر عليهم من هيله اخت صويلح ولاتهون فطاير الجبن اللي ترسلهم حصيصه واللي ماياكلهن احد لان صويلح مخليهن معه ذكريات جاء صبح الخميس وكان فيحان توه يقوم وخشته صايره كنه طرمبة حقت الهوا (طرمبة = اداة تستخدم لنفخ الكورة بالهواء واسالوا راعين لعب الكورة بالشارع) وتفاجا ان صويلح الى هالحين يذاكر وشاف نص دفتر صويلح يكتب فيه حص ولاتهون القلوب وكان فيحان يناظر مستغرب يقول وش ذا التفاحه المعوقه ياصويلح

جاء يوم الاختبار كانوا رايحين مبكرين وصويلح مشغل أغنية متى اشوفك متى القاك متى قلبي يحس انه لقى نفسه لقى عمره ونبضة يكتب احساسه وفيحان وهو يسوق ماسك الكتاب ويفتح الصفحات بسرعه يقالك انه يذاكر وصويلح فاتح الدريشه ومطلع يده وخذ ياهواجيس >>ذابحه الحب

ويقول بنفسه حصيصه هالحين تتنفس نفس الهواء اللي اتنفسه وتشوف هذي السماء ونفس الطريق هذا هي شافته آه ياقلبي والتفت للمرتبه اللي وراء وقال كانت قاعده هنا احبها ياناس اييه يالدنيا وقعد يتذكر لحظات طفولته مع حصيصه

ويتذكر يوم كان يعلمها تلعب مصاقيل وكانت تناديه اذا ضربها شليويح ويجي صويلح ويركض وينقز على شليويح اهم شي عنده يدافع عن حصيصه ويتذكر يوم كانوا يلعبون كورة بحوشهم والبنات يطلطلون(يويقون) عليهم وايام ماكان يستعرض قدامها بسيكله وعلى باله يبي يسوي غزاله ويصلفط على ظهره ونزلت من صويلح دمعه تذكر يوم يلاقيها صدفه عند باب بيتهم بعد ماطاحت شنطتها وتنثرت الكتب بالارض وجاء صويلح وشال الكتب وحصيصه تناظر بحياء ويقطع حبل ذكريات صويلح فيحان وهو قاعد يسمع تعريف علم الاجتماع ومير يلتفت عليه صويلح ويقول: منتب سهل ياهاني وراه ماتركد لااصفقك وكل هالجوايس بطريق المدرسه مع انها جنب بيتهم بس طول الوقت واقفين اثر فيحان ناسي يفك الجلنط (لاول مره تعتري فيحان حالة دلاخه) مشوا للمدرسه وكانوا متاخرين وهم بالفصل صويلح مدهر يحل وينغزه فيحان صلوحه سوال جيم ياخي ويسوي صويلح حركته الشهيره اللي على باله مزكم ويحكي شوي لفيحان وبعد ماخلصوا اختبارات جت توزيع الشهادات وصويلح متشقق من الوناسه ويقول لفيحان خلاص مابقى الا شوي واتزوج حصيصه اخذوا الشهادات صويلح نجح بنسبة 93 % >>ماشاء الله على الدفاره هههه وفيحان بنسبة 87% ويرجعون للبيت مستانسين صويلح خشته صايره تقل وسبر محطوط عليه ايقنور >>هذه الفاظ مستقاة من الشات)

ومن صباح بكرا صويلح لاابوه يقول مشينا يالله لحصيصه وبعد هوشات مشوا العصر لبيت حصيصه
فتح لهم ابو حصيصه ودخلوا وبعد عدة فنيجيلات قهوة قال ابو صويلح:حنا جايين نبي بنتك حصيصه لولدي صويلح ابشرك نجح واشتغل بمستشفى التخصصي

صويلح: بس؟؟؟

ابو حصيصه والله ماادري وش اقولكم بس حصيصه مخطوبه..!!!!

صويلح: اصابه الذهول ويبكي ويذرف الدموع ويطلع يركض من الحوش ويلتفت يلقى حصيصه تطل من الدريشه ويناظرها وهي تبكي وتبكي وهو صد عنها وقال:تركتني ياغدار بليا عذر وهذا الجرح بصدري قهر

--------------------------------------------------------------------------------

وطلع من البيت وركب السيارة ومشى بكل تهور مشى بالشوارع مايدري وين يروح حس انه كره هذي الدنيا كلها ومافيها خلاص بدا يحس احساس اخذ كرت احمر بمباراة نهائيه واول ماتبادر الى ذهنه صديقه فيحان
لقى فيحان واخذه فيحان وراحوا للبر وقعدوا يفكرون وقال فيحان لصويلح:وش رايك نسافر ندرس برا؟

صويلح:اللي تبي يافيحان بس فكني من هاللي انا فيه

فيحان:خلاص من جد نبيع سيارتي اللكزص وانت بع موترك ونسافر للوس انجلوس خابر لي واحد اعرفه هناك

صويلح:خلاص يالله خلنا نتجهز

وزبط فيحان كل الشغلات وباع السيارتين وراحوا يتقضون وكل منهما طق له شورت فوشي قالوا لااهلم والعالم تصيح وراهم تسافرون ومدري وشو وصويلح جايه تبلد احساس من كل شي بعكس فيحان الي كانت الدنيا مش سايعاه
قبل يوم من السفر صويلح كان يفكر وش يبي يسوي هناك كل تفكيره شلون يضيع فلوسه ابشري موستنج وابضف من هالشقر واتمشى بهن انا وفيحان بلاهالخربطه اللي هنا >>هذا اللي بيدرسون
مطاريس حصيصه وشليويح وجاء موعد السفر مر صويلح على فيحان وكان ابو صويلح هو اللي يوديهم وصلوا المطار واذا بعالم كلهم يودعونهم كل بزارين الحارة ولا يهون شليويح ايضا وفطيمه متوزيه وراء عامود على بالها مستحيه من فيحان وفيحان ماجاب خبر قاعد يناظر ارقام الرحلات مستغرب يقول ياذا ابو جلمبو حتى هنا حاطين اسمه وصويلح جالس على الكرسي ينتظر فيحان يخلص من التجهيزات حس صويلح بشي في قلبه بدا يتحرك شي بمشاعره وصار يتلفت ويدور وبين جموع هالبنات المحتشدات لوداع فيحان وهو يدور مابين العيون والخشش وحس انه وده يبكي حس ان الامل بعودة حصيصه موجود وفقد الامل بعد ماشاف خشة شليويح وهو مبتسم اخذوا الشناط وهم يمشون ويلتفت بكل حزن يودع اهله وهو يحس انه الوداع الاخير ويقول بنفسه:حصيصه هذا آخر شي بينا خلاص منيب شايفك طول عمري ابترك كل هالديره اللي فيها بترك كل اهلي خلاص وفيحان كان يلوح بيده الكريمه على جموع الفتيات وهن متسدحات يصارخن من اجل فيحان ولاتهون فطيمه اللي ماسكه صورة فيحان وقاعدة تشجع >>حشا صارت مباراة الهلال
وبعد ماجو يدخلون الطياره وفجاة وقف صويلح!!!
فيحان: صويلح وش جاك؟؟
ويلتفت صويلح ورا وراح يركض ويركض ويركض والناس تناظر صويلح وابو صويلح يصارخ:صويلح وين تبي تروح؟
وفيحان:يلحق صوييييييلح لاتروووووح

ومن بين كل هالزحمه كانت تلك الفتاة التي احبها صويلح الفتاة التي ذرف دموعها لااجلها جايه تركض من اول المطار بعد معاناة مع ابوها جايه وهي تبكي وصويلح شافها وراح يركض ويبكي وهي تركض وتبكي وحدث اللقاء!!

انه صويلح يلتقي بحصيصه من جديد وتغمر حصيصه دمووع من الفرح وتعجز على الكلام وصويلح ماقال شي الا كلمة أحــبــك
وحصيصه ترد عليه:أحــبــك
وصويلح يرد:أحــــبــــــك
وياخذ يدها ويحطها بين يدينه
وفطيمه انهارت من هول المشهد وخمت عامود وقعدت تصيح
وفيحان راح نقز على جموع الفتيات يباشرعليهم بسندويشات فلافل وشليويح اختفى وابوصويلح وابوحصيصه مو مصدقين
وبذلك انتهت معاناة العاشقين...

اتمنى لكم المتعه في القراءه

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]


[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

هههههههههههه


حلوووه بس تعبت وأنا أقرى



حصيصه:فطيمه طلعي خشتك مع الدريشه واذا نغزتك مع بطنك اصرخي بما ان ذا الددسن مافيه بوري


رووووعه

هههههههههههههههههههههههههههههههههههههههههههههههه

روووووووووعه وخباااااااال موب صاااحين ,,

احدااث القصه عجيييييييييبه ,,, والوصف اعجب هههههههههههههههههههههه

عليهم رومنسيه ولا رومنسية روميو وجوليت هههههههههههههههههههههههههه

ولا جو بعد عندنا بالشرقيه ,, كان قلتلى استقبلهم ههههههههههههههههههههه

الله يسعدك موتنى ضحك ,, مررره جنان وخبال ههههههههههه

بس بينى وبينك ومااقول لاحد ,, انت اى واحد منهم صويلح الرومنسي والا فيحان الفزعه ههههههههههههههه

يسلموووووووو خيو على الموضوع الممتع ,,

واللى حتى عنوانه رووعه ,, على قولة بعض الناس ها ههههههههههههههههه

الله يسعدك وين ماتروح ,,,

ننتظر جديدك بشوووق,,,

دمت مبدعا كما عهدناك ,,,